Tay Kichijket Ne Tijtitanijtuk ne makwil ipal ne ajamat tik ne Yankwik Sentaketzat, wan witz ipan ne nawi yeknawatilis. Inat ka ne kitajkwiluj ini amat ne tajkwiluani ipal Ne Iyeknawatilis Lukas. Sejse kimatit ka ini ume amat kichiwat se: Lukas ne achtu takutun wan Tay Kichijket ne ukse takutun. Lukas techilwia ken ijtuk iwan Yeshu kwak yaja yultuk, wan Tay Kichijket techilwia tay panuk ijtik ne ajachtu Cristianoj kwak miktuya.
Tay Kichijket kipia 28 takutun. Shiamatachia tik Bible Gateway.
Sejse inat ka ne intajkwiluani ini ajamat se tapajtiani ne yajki iwan Pawlo. Sejse kimatit ka te ijkiuni, wan uij ma tinakan su ijkiuni o te.
Tik ne yejyeknawatilis, Yeshu kintuktij ne mumachtianimet yawit nujme ne taltikpak tamachtiat tay kinhilwij. Tik Tay Kichijket ne mumachtianimet pewat tik Yerushalem, kan nemituyat kwak mikik Yeshu, wan pewat pashaluat nujme ne talmet ne muishmatit katka ikman tik Ewropa: Siria, Asia (kinekituya ina ne Turquia ipal ashan), Grecia wan Roma. Melka ini amat itukay Tay Kichijket Ne Tijtitanijtuk, semaya techilwia ken ijtuk iwan ume yejemet: Pedro wan Pawlo.
Tik ne ajachtu majtakti-ume takutun, ne wey personaje ipal ini amat Pedro, ne ititanijtuk Yeshu. Kwak mikik Yeshu, Pedro (ne nusan itukay Shimon) tamachtij tik Yerushalem wan miak muyulpataket ipanpa tay kichiwa wan kikwijket Yeshu. Pejket kintemuat wan kinmiktiat ne mumachtianimet ipal Yeshu tik Yerushalem. Se yejemet itukay Estepano. Inat ka kukujtaketzki wan kitejteminket. Melka uni, nakat tik Yerushalem wan tekitit wey.
Nusan nemik ukse Yudayuj itukay Shaul. Yaja kishijiat katka ne Cristianojmet wan kinchiwilij miak tay teyek. Kwakuni, yaja kitak tzitzinaka se tawil ka ikajku wan kitak ka Yeshu kinutzki wan kilwij ma kipalewi. Shaul muyulpatak. Kipatak ne itukay, pejki munutza Pawlo. Yaja munamik iwan ne Cristrianojmet wan pejki tekiti inwan. Pejki pashalua nujme wan tik miak techan tamachtia wan kiketza ne ajachtu sennemit ipal Cristianojmet tik “Asia” wan Grecia. Yajki ka Yerushalem uksenpa. Ne Yudayujmet kwalanit iwan. Nusan se tatuktiani ipal Roma inak ka yaja ina tay teyek wan kitentzak. Kiwikaket ka Roma pal kichiwat juzgar, wan nakak tzaktuk ume shiwit. Te tikmatit ken ijtuk tipan: sejse kimatit ka kimiktijket tik Roma, wan sejseuk kimatit ka kiski ka né wan yajki España.
